नीति वचन

 

डॉ0 हरि नाथ मिश्र, अयोध्या, (उ0प्र0)

 

नीति वचन-21

जहाँ धरम तहँ प्रभू-निवासा।

करम-धरम बिनु पुर्न बिनासा।।

राखहु करम-धरम नहिं अंतर।

करमइ धरम कै असली मंतर।।

संपति-बिपतिहिं एक समाना।

चिंतक-साधक-संत-सुजाना।।

तजै न चंदन निज सितलाई।

रहँ भुजंग बरु बहु लिपटाई।।

संत-बचन कै नहिं कछु मोला।

बाल-सुभाउ संत-मन भोला।।

पुरुष लिप्त आलस्य-प्रमादा।

रहहि भयातुर लोक-प्रबादा।।

अस जन कायर परम गुमानी।

लक्ष्य-सिद्धि नहिं अस अग्यानी।।

जे कछु निज मन आवहिं भावा।

पुनि बुधि परखहिं भाव-प्रभावा।।

संतन्ह हृदय भाव रह बाढ़ा।

प्रभुहिं प्रेम यहिं तें रह गाढ़ा।।

जासु हृदय नहिं भाव-प्रधाना।

हृदय तासु पाषान समाना।।

प्रभु प्रति उमड़ै जब हिय भावा।

बुधि अपि भाव-बेग मिलि जावा।।

बुधि अरु तर्क परे प्रभु-प्रेमा।

बिनु सुचिमन नहिं भाव न नेमा।।

कोमल-कठिन भेद अस मानउ।

जिह्वा-दंत-भेद जस जानउ।।

टूटहिं दंत जीभ रहि जाए।

कोमल भाव कठोर न पाए।।

दोहा-सत्य रहहि जग मा सदा, मिटइ असत-अस्तित्व।

कोमल बानी जे भखहिं, भुलइ न तिसु वक्तृत्व।।

 

 

     नीति-वचन-15

जे घर नारी नहिं सम्माना।
जानउ ऊ घर नरक समाना।।
बसहिं देव जहँ पूजन नारी।
कहहिं सास्त्र अस सोचि-बिचारी।
पापी कुल ऊ अधम समाजा।
जे रच्छहिं नहिं नारी-लाजा।।
नारी ममता, माता-मूरति।
कबहुँ न बिसरै माँ कै सूरति।।
माँ कै अँचरा स्वर्ग समाना।
मातु असीष असिष भगवाना।।
माता प्रथम सिसू-पठसाला।।
जननि रचै सिसु-चरित निराला।।
दुर्जोधन कीन्हा अपमाना।
दुर्गति भई तासु जग जाना।।
सीता-हरन कीन्ह जब रावन।
लंका जरी मरा कुल-लावन।।
जानउ नहिं नारी अब अबला।
परम प्रबीना नारी सबला ।।
सिच्छा-समर-ग्यान-बिग्याना।
निपुना-कुसला त्रिय-पहिचाना।।
नहिं अब अंतर नर-अरु नारी।
दुइनउँ सम-समान अधिकारी।।
गगन-मार्ग नभयान उड़ावहिं।
रिपुन्ह समर महँ धूरि चटावहिं।।
दोहा-अहहिं नारि अब दच्छ बहु, रखहु तिनहिं कै मान।
नाहिं त तोरिहैं ई सभें, सकल पुरुष-अभिमान।।

 

 

       चौपाइयाँ

 

नीति-वचन-24

जग प्रपंच-पाखंड निरंतर।

राखहिं मनुज-मनुज मा अंतर।।

मंदिर-मस्जिद अरु गुरुद्वारा।

अहहिं प्रेम कै सभ दरबारा।।

पर इक दुस्मन भे अब दूजा।

ढाहहिं धाइ-धाइ थल पूजा।।

खल प्रपंच करि करहिं बिनासा।

मनुज रुधिर कै मनुजइ प्यासा।।

जनु सैतान सबहिं मन आवा।

दिया उलट जन-मानस-भावा।।

प्रेम-भाव कै बचन न भाए।

कटुक बचन रह जिह्वा छाए।।

धरम-धुरंधर भए बिधंसक।

अनितिहिं-अधरम परम प्रसंसक।।

राम-रहीम बाँटि रहमाना।

अपुनहिं कहहिं हमहिं भगवाना।।

पंडित-मुल्ला औरु मौलबी।

धारि धरम कै बड़-बड़ पदबी।।

भटकहिं निज अग्यान-अँधेरा

बिकल जगत बिनु ग्यान-उजेरा।।

भूलि क मैं-मैं करउ समर्पन।

तन-मन-हृदय प्रभुहिं कहँ अर्पन।।

तुमहिं मिलइ तब प्रभू-प्रसादा।

होय मुक्ति भव-भय-अवसादा।।

प्रेम-समर्पन-अर्पन-भावा।

जहाँ उहाँ रह प्रभू-प्रभावा।।

प्रीति साँच सुचिता सँग रहई।

कपटी हृदय प्रीति कस भवई।।

दोहा-सदा सुद्ध मन प्रेम -घर, अहंकार अँधियार।

औरु समर्पन प्रभु मिलैं, अर्पन घर उजियार।।