अशोक कुमार यादव मुंगेली, छत्तीसगढ़
(नया अध्याय, उत्तराखण्ड) (w) 6395080071
कबाड़ीवाला
टूरी:
कोनच ग चिल्लाथच, ए गाँव म आ के।
का-का तँय लेथच, मोला तँय बता दे।।
रेरी पारत हच बिकट, चोंगा ल लगा के।
गुरतुर गोठियाथच ग, मोला बला के।।
कबाड़ीवाला:
मँय कबाड़ीवाला ताँव टूरी, आना तीर म आना।
का-का तँय लाए हस गोरी, मोला तँय देखाना।।
टूटहा-फुटहा ल धरे हच, लोहा म जंग लगे हे ओ।
करिया-करिया दिखत हे, का रंग एमा डरे हे ओ।।
घर म अउ होही कबाड़ त, झटकुन ओला लाना।
मँय कबाड़ीवाला ताँव टूरी, आना तीर म आना।।
टूरी:
सुग्घर तँय ह तउलदे, काँटा झन मारबे।
बाँचे-खोंचे जिनिस ल, तखरी म डारदे।।
फेर आबे कोन दिन, बता दे तँय मोला।
रद्दा देखत रइहँव, तरसत रइही चोला।।
कबाड़ीवाला:
मँय कबाड़ीवाला ताँव टूरी, आना तीर म आना।
का-का तँय लाए हस गोरी, मोला तँय देखाना।।
जब बलाबे तब आहूँ मँय ह, ले बर तोर भंगार ओ।
घुमथँव गाँव के गली म, करले मया के करार ओ।।
सुरता राखे रहिबे मयारू, बना डारे मोला दीवाना।
मँय कबाड़ीवाला ताँव टूरी, आना तीर म आना।।






