डॉ0 हरि नाथ मिश्र, अयोध्या।
(नया अध्याय, देहरादून)
लोक-गीत
भईल सरदिया कै धावा,
बलम ओढ़ना लेके आवा।।
ओढ़ना ले अइ बा त पूड़ी बनाइब,
पुड़िया के सँगवाँ हम खिरिओ पकाइब।
पुड़िया कै भोगवा लगावा….. बलम ओढ़ना ले के आवा।।
निमियाँ के तरियाँ हम कउड़ा जराइब,
अलुवा के भूजि-भूजि तोहका खियाइब।
खाइ-तापि भगिया जगावा……बलम ओढ़ना लेके आवा।।
लौंगइ-इलाची कै बिड़वा लगाइब,
इत्तर के खुशबू से ओके सजाइब।
पान खाइ मुहँ महकावा……… बलम ओढ़ना लेके आवा।।
तोहरे बिना घरवा बड़ सून लागै,
सेजिया-अटरिया त धइ-धइ काटै।
आइ घर जड़वा भगावा………. बलम ओढ़ना लेके आवा।।
रहरिया-केरइया कै निमन-निमन छिमियाँ,
अस नीक लागै जस सोनवा कै खनियाँ।
आइ रूप अपनो देखावा………बलम ओढ़ना लेके आवा।।
धरतिया पे सरसों त फूलै लागल,
पहिरि पीयर चुनरी बनावै पागल।
आइ सुख धरती कै पावा……..बलम ओढ़ना लेके आवा।।







