User
ब्यूरो देहरादूनः (नया अध्याय)
सौं-करार टीरि, लोकभाषा साहित्यिक समितिन देरादूण मा आयोजित करि गढ़वाळि कविता विमर्श।
——————-
देहरादूनः मंगलवार दिनांक 16 जून 2026 अमोलाज फेमली रेस्टोरेन्ट देरादूण मा सौं-करार टीरि, लोकभाषा साहित्यिक समिति का संस्थापक अध्यक्ष अरविन्द ‘प्रकृति प्रेमी’ का दिशा निर्देशन मा गढ़वाळि कविता साहित्य मा बेहतर रचनाशीलता का उद्देश्य से गढ़वाळि कविता विमर्श की तीसरी संगोष्ठी कु आयोजन कर्ये गै।
ये विमर्शौ विषय-‘‘आजकल मैंन गढ़वाळि कविता मा क्या अनुभव करि? ’’ छौ। संगोष्ठी का बतौर मुख्य अतिथि कवि सुशील चन्द्रा अर अध्यक्षता वरिष्ठ/ प्रसिद्ध साहित्यकार महाबीर रवांल्टन करि। कार्यक्रम कि अध्यक्षता करदी महाबीर रवांल्टन बोलि कि, कविता साहित्य का खातिर हम तैं लोक सणि नजदीक से समझण होलु तबै हम समाज तैं समझला, तैका संघर्ष तैं जाण्ण होलु। गैरि अनुभूति कर्यां बिगर, हम अच्छु साहित्य नि लिखि सकदन। पलायन तैं नई दृष्टि से देखणा वास्ता हम तैं मानसिक पलायन नि कन्न होलु। मुख्य अतिथि सुशील चन्द्रन बोलि कि, कविता एक स्वीलि (प्रसव) पीड़ा कि जनि ही होंदी।कविता तबै निकळदी जब ये प्रकार का भाव-विचारों कि अनुभूति होंदी। तौंन कवि का भोगता होण कि तरप अपणु इसारु करि। संस्था का संस्थापक अध्यक्ष अरविन्द प्रकृति प्रेमिन अपणि बात मा बोलि कि, कविता मा विचार होंन त संवेदना, भाव होंन त तार्किकता हो यीं जटिलता तैं हम तैं समझण पड़लू अर बदलौ का खातिर वैज्ञानिकता कु होणू बि। हम तैं संरक्षणवादी कविता कि दुन्यां से गनै जाणै जरूरत च अर समसामयिकता मा अपणा समय तैं दर्ज कन्न, कवि कर्म कि जिम्मेदारी च। सामाजिक चेतना तैं अपणा समय मा फोटोग्राफी ना बल्कि रचनाकार चि़त्रकारी करु। देश-दुन्या कि कविता से, बड़ा रचनाकारों तैं पढ़ण से ही यु समझण सरल च कि अच्छी रचनाएं कनकै लिख्ये सक्येंदिन ? गीता गैरोलन- वर्तमान सामाजिक हलातों का बिगड़दा स्वरूप पर चिंता जताई, मनख्यात, नशामुक्ति, सामाजिक बुराईयों पर सब्यों कु ध्यान खींची। शिवदयाल ‘शैलजन बोलि- भाषा कि मौलिकता मा शब्दों का प्रयोग पर चिंता जताई अर गढ़वाळि कविता मा मौलिक शब्दों का कम प्रयोग होण से, रळ्यां – मिस्यां (मिश्रित) भाषा का कारण हमारि कविता हळकी पड़णी च। सामजिक बदलौ का वास्ता जु काम पत्रकार कना छन तनि ही कवि तैं बि कन्न चैंदू। कवि तैं सामाजिक जटिलता तैं पलटणै ताकत अपणि कविता मा रखीं चैंदी। डाॅ0 सत्यानन्द बडोनिन अपणि बात मा-कविता मा जन सरोकार, अर साफ-सुथरा समाज, जन कल्याण कि बात बोलि। कविता मा मानकीकृत भाषा शब्द विपुल सम्पदा पर अपणा सार्थक विचार रखिन। खास सावल बि रेखांकित करिन। रक्षा बौड़ाई हिलांसन बोलि- सामाजिक घटना, संघर्ष, मनख्यात का खातिर कविता मा समाज कि आवाज उठोणै बात करीं चैंदी। अपणा समाज से भैर कि तरप बि झांकण, समाज का बदलदा स्वरूप पर बि नजर रखीं चैंदी। सटीक बिम्ब अर प्रतीकों प्रयोग, कविता कि नई शाषा शैली तैं जरूरी बतायी। ये से विचार विस्तार होलु। अर्चना गौड़न सामाजिक विषय पर प्रयोगवादी, प्रगतिवादी रचना पुराणा पैटर्न तैं तोड़िक, ये से हटिक नयु लेखनौ विचार रखि।
साथ ही यीं संगोष्ठी का दूसरा चक्र मा एक शानदार कवि गोष्ठी बि ह्वे । जींमा सुशील चन्द्रन “मेरा गौं का लोग” शिवदयाल शैलजन गजल- “कुंगळि जिकुड़ि मायादार कख रयान” गीता गैरोलन “कना गौं कुटुम बिगड्या?” अरविन्द प्रकृति प्रेमिन “द्वी बसंत” अर्चना गौड़न “हम तैं ना दिखा” रक्षा बौड़ाई हिलांसन “लोकतंत्र” पर, महाबीर रवांल्टन “सी कूण?” डाॅ0 सत्यानन्द बडोनिन “इंसानी रंग” एक से बढ़ि एक गैरी संवेदना, विचारों से समृद्ध रचना सुणायिन। ये दौरान हरेक कवि/कवयित्री कि कविता पर समीक्षात्मक विचार विमर्श बि ह्वे।
कार्यक्रमा सफल आयोजन का खातिर महाबीर रवांल्टन अरविन्द ‘प्रकृति प्रेमी’ का साहित्यिक कार्य कि पुलमें (तारीफ) बि करि अर सबुन ये कार्यक्रम तैं गढ़वाळि कविता साहित्य मा बेहतर, नई दृष्टि कि रचनाधर्मिता का वास्ता अच्छी पहल बते। ये कविता विमर्श कार्यक्रमौ सफल संचालन रक्षा बौड़ाई हिलांसन करि।
